laugardagur, mars 29, 2003  

MR-bloggvika - Dagur V

Í gærkveldi framdi bloggari djöfullegt afthæfi. Hún fór á samkomu andstæðinganna á A. Hansen í Hafnarfirði. Anna Tryggvadóttir má vita að það þurfti mikið til að undirrituð færi. En þó var ansi skemmtilegt, m.a. líkti Davíð Þór Jónsson Sollu við kokkteilsósu. Athyglisvert.

Eftir það lá leið okkar stallnanna í teiti á Lynghaga númer 10. Allt í einu rann upp fyrir okkur sú staðreynd að vinir vorir í MR voru einnig með gleðskap í sömu götu. Í ljósi þess hversu gaman var í fyrra ákváðum við að heilsa lítillega upp á drengina. Þeir voru í banastuði og bauð gestgjafi okkur upp á kakó og brúnköku. MR rúlar sannarlega, það er alveg á tæru.
Eftir enn meira sumbl og vitleysu annars staðar í götunni héldum við heim en ákváðum að kasta plastflöskum og mandarínum út um bílgluggann. Vissulega hápunktur kvöldins.
Annars eru kosningar á næsta leiti í Hamrahlíðarskóla og mun undirrituð etja kappi um málfundafélagið ásamt fleirum.
X-LENÍNGRAD Í MÁLFUNDAFÉLAGIÐ!
Da.

|Dagga| 11:56

---

föstudagur, mars 28, 2003  

MR-bloggvika - Dagur IV


Bloggari lá í mestu makindum heima hjá sér. Hún var að lesa bók eftir Benjamin Lebert sem kallast Crazy. Mjög ánægjuleg lesning; eins konar Catcher in the rye án látins bróðurs og vinaleysis. Nema hvað, allt í einu hringdi dyrabjallan. Og viti menn, þar stóðu ljúfar ungar stúlkur að safna dóti á tombólu. Án þess að hika og skamma þær fyrir að vera með ónæði í fjölbýlishúsi rauk ég inn í herbergi og ætlaði sannarlega að losa mig við allskyns ófögnuð.

Hænan gaf:
- Jólasveinastyttu sem hefur legið út í glugga síðan 1999
- An Outline Of American Agriculture - Fékk þetta í enskuverðlaun árið 2000. Oj bara.
- 3 gömul eintök af Undirtónum síðan 1998 ásamt nýjasta eintaki kvennaritsins Orðlaus
- Stuttermbol frá Íslenskri Erfðagreiningu
- Almanak hins íslenska þjóðvinafélags frá 1998. Öllum almennilegum tombólum er skylt að eiga a.m.k. eitt almanak!
- Fótalaust brúðugrey sem klætt er í pólska þjóðbúninginn
- Og loks bókina DÍS. Bloggari er að rýma til í bókaskápnum fyrir gersemum bandarískra bókabúða og þá er maður ekki að halda upp á slíkan sora sem þessar svokölluðu ,,kvennabókmenntir" eru.

Bloggari færði stúlkunum stolt þennan mikla fjársjóð sem þeim var ætlað að hlotnast. Sjálf var ég iðin við tombóluiðkun á yngri árum og prýddi oft síður Morgunblaðsins. Afraksturinn átti alltaf að vera til styrktar forræðisdeilu Sophiu Hansen. Í raun vildi ég ekki gefa Sophiu peninginn, hann átti að fara til Dagbjartar, dóttur hennar í Tyrklandi (af augljósum ástæðum). Ég eyddi líka töluverðum fjármunum í tombólu eina þegar ég var í 3. bekk, eða u.þ.b. 1180 krónum. Á okkar mælikvarða er það svona 10.000 kall. En hvílík gleði.
Allavega, þá breyttust stelpurnar sem áður höfðu virst ósköp ljúfar í bandvitlaus dekurskrímsli samtímans. Þær tóku við öllum framlögum mínum nema einu; þær vildu ekki sjá bókina DÍS. Kom þá á daginn að þeim hafði hlotnast önnur eins bók í kiljuformi 3 blokkum áður. Þær vildu alls ekki sjá annað eintak í sínum fórum og strunsuðu burt án þess að þakka fyrir sig.

Saga þessi sýnir aðeins fram á eitt, að ung börn til dags eru ljót og leiðinleg, dónaleg og dramblát. Mér finnst að það ætti að senda þennan smálýð í rækju, götuhreinsun, jafnvel í hernað.

Ég held að ég verði kannski leiðinleg kelling á eldri árum. Kæfið mig þá bara með kodda.

|Dagga| 12:37

---

fimmtudagur, mars 27, 2003  

MR-Blogg - dagur 3

DAGBJÖRT BEILAR Á SJÁLFSTÆÐISFLOKKNUM


Bloggari er í menntaskólakór. Kór Menntaskólans við Hamrahlíð. Það er ágætur kór og gaman að syngja með honum. Ekki þó alltaf.

Þannig er nú mál með vexti að í kvöld verður setningarathöfn 35. Landsfundar Sjálfstæðisflokksins. Hamrahlíðarkórunum hefur nú verið gert að syngja fegurstu lög sín á þeirri athöfn með hljóðfærum og miklu tilstandi; í hvítum kjólum og með bros á vör. Aldrei, segi ég - ALDREI!

Ástæðan fyrir þessari afstöðu minni er einföld. Það samrýmist ekki minni sómatilfinningu að skemmta sjálfstæðismönnum í einlægni á svo opinberum vettvangi, þá sérstaklega í ljósi undangenginna atburða. Einnig fyndist mörgum flokkssystkinum mínum undarlegt að sjá mig í fremstu röð (þar sem ég er jafnan staðsett á tónleikum vegna smæðar) - syngjandi ,,Ísland, farsældar frón" um leið og ég skipa 12. sæti á lista SF. Í mínum augum eru stjórnmálaflokkar ekki eins og fótboltalið. Nú er stríð, bæði í Írak og hér heima. (Ég hefði samt sennilega sungið fyrir VG því þau eru svo sæt!)

Þegar við fengum þessar fréttir ætlaði Anna Tryggvadóttir einnig að sniðganga þessa samkundu þar sem hún skipar líkt og ég sæti á lista. Síðan kom á daginn að Þorgerði vantaði bráðnauðsynlega sellóleikara í Vorvísu Jónasar Hallgrímssonar og Anna er sú eina sem kemur til greina. Listagyðjurnar meinuðu því Önnu að sýna mótþróa og ég skil hana vel.

Nú hafa margir sagt við mig að þeir skilji ekki afstöðu mína; ég ætti alveg eins og þau að geta komið fram sem listamaður og hætt þessu rugli; ég sé ekkert merkilegri en þau.
Að sjálfsögðu er ég það ekki. En ég er heldur ekki listamaður. Ef eitthvað er, þá er ég meiri pólitíkus en listamaður. Ég á ekki að þurfa að gera eitthvað gegn vilja mínum fyrir Hamrahlíðarkórinn með fullri virðingu fyrir hans göfugleika. Þau skipti sem ég hef þurft að fórna e-u fyrir kórinn eru orðin æði mörg en ég sé ekki eftir þeim tíma enda er kórinn afskaplega svalur. Og þið öll - mín kæru kórsystkini.

Ég er bara ekki að sjá mig í anda, syngjandi fyrir Geir H. Haarde og Davíð. Og ég gæti alveg eins gert eitthvað ljótt af mér ef ég sæi Björn Bjarnason vappandi þarna um. Og mér yrði strítt af Heimdellingunum!

|Dagga| 11:33

---

miðvikudagur, mars 26, 2003  

MR bloggvikan heldur áfram - dagur 2

Um þessar mundir prýðir bloggari ýmsa áróðursbæklinga út um bæ allan. Ýmsir kynnu að halda að það hefði verið meðvitað athæfi mitt að lenda á slíkum bæklingi en svo er ekki. Ég einfaldlega mætti í e-a hópmyndatöku á laugardegi og á miðvikudegi er ég í opnu fréttablaðsins. Ég hefði nú kannski greitt mér ef ég hefði vitað af áróðrinum.

Annars eru samræmd stúdentspróf verk Satans (BB). Ekki aðeins eru þau kennslufræðileg glappaskot, heldur eru þau mjög svaka harla rosa tsjittsjíng dýr. Semsagt, Björn Bjarnason er fáviti. (Hann ákvað þetta elskurnar; síðasta verk hans í ráðuneyti!) Hugsið ykkur því aðeins um áður en þið búið til skutlu úr andlitinu á mér. Fólkið sem prýðir þennan bækling með mér eru allt ungir frambjóðendur SF. Á þessari mynd eru þó jafn-margir í baráttusætum til Alþingis og prýða opnuauglýsingu Sjálfstæðiskvenna - og þar eru þær eitthvað um 20 kellingar. Pælið í því!

|Dagga| 12:35

---

þriðjudagur, mars 25, 2003  

MR-ÞEMAVIKA 2003 - Samstarfsverkefni Dagbjartar Hákonardóttur og Söndru Óskar Snæbjörnsdóttur.

Að tilefni föstudagsins þykir okkur stúlkunum í óvinalandinu viðeigandi að hylla forna fjendur vora og blogga í þeirra nafni. Margir vita eflaust ekki um dýrð MR-bloggara. Þá eru þeir að missa af miklu því þeir eru heil fræðigrein út af fyrir sig.

Hvað felst nú í MR-bloggi?
Í stuttu máli má segja að MR-blogg séu yfir öll önnur blogg hafin. Þau eru nokkuð háfleyg þar sem bloggarar tala um sig í 3. persónu eins oft þeim og unnt er. Það er þó mismunandi. MR-ingarnir eru alls ekki allir í MR en flestir þó aðallega fyrrverandi eða núverandi nemendur við skólann (hence = MR-blogg!).
Í eina viku mun ég gangast undir nafninu HÆNAN því maður er ekki bloggari með bloggurum ef maður kennir sig ekki við dýr. Sandra Ósk mun kenna sig við Slöngu og er það vel.

Af Hænunni er þó allt gott að frétta. Í gærkveldi tók hún sig til og bakaði kanilsnúða. Heppnuðust þeir afar illa. Hænunni láðist nefnilega að kveikja á viftunni í ofninum og því fór sem fór. Mæðgurnar í Gullsmára fá því aðeins grjótharða kanilhnullunga með kaffinu í dag.

|Dagga| 09:41

---

mánudagur, mars 24, 2003  

Roman Polanski vann! Húrra. Einhvernveginn held ég nú samt að akademían hafi kosið hann til að láta reyna á undirgefni bandarískra stjórnvalda en allt fór fyrir ekki, hann þurfti að húka heima fyrir.

Já, ég horfði smá á Óskarinn á meðan ég gerði við tölur og stoppaði í sokka. Steve Martin var of fyndinn í opnunaratriðinu og ég bara átti ekki eitt aukatekið orð yfir brandaranum með Kathy Bates í heitapottinum. Íhí. Svo henti einhver síma upp á sviðið. Kannski sá sami og gerðist sekur um flöskukast á Robbie Williams?

Ég ílengdist eitthvað til klukkan þrjú hálf fjögur, eða alveg þangað til að CATHERINE ZETA-JONES VANN!! Þá fór ég nú bara að sofa. Þetta er aulakeppni og ekki gæðastandard í eina mínútu (nema ég hlyti verðlaunin, að sjálfsögðu. Þá væru þetta bestu verðlaun í heimi!). Frú Douglas var asnaleg að vanda. Kellingaleg, með ferlega lítinn sjarma og finnst hún vera ferlega fyndin að tala um hormónana sína. Sem leikkona er hún ekki alslæm en ekki betri en a) Kathy Bates eða b) Julianne Moore. Ja svei, jafnvel Queen Latifah er skemmtilegri en hún. Einnig var ég mjög frústreruð á því að Chicago hafði betur en m.a. LOTR fyrir sviðmynd. Hnuss.

Gangs of NY fékk svo bara ekki neitt? Ég hef reyndar ekki séð Chicago en ég get ímyndað mér að hún sé óttalega amerísk. Og lögin eru ekkert sérlega intressant. Sum sé, vídjóspóla í sumar. Ég get ekki ásakað sjálfa mig fyrir að sniðganga auglýsingaskrum í sæmilegum gæðaflokki.

|Dagga| 15:04

---

sunnudagur, mars 23, 2003  

Ég er að brugga launráð hægri vinstri ......

Við Sandra ætlum að hafa mjög skemmtilega þemaviku sem hefst á þriðjudaginn og mun hertaka bloggsíður vorar. framtakið er ekki af verri endanum ef mér leyfist að segja frá. Síðan er ég að fara út í pólitískar aðgerðir ásamt m.a. samherja og flokksandstæðingi mínum, Önnu Tryggva. Mikið í gangi þar líka.
(geisp) Óskar í kvöld. Ætla ekki að horfa. Gangs of NY tekur allt. Oj bara.

|Dagga| 21:11

---